Nýjar áherslur í hluthafastefnu LV

Lífeyrissjóður verzlunarmanna hefur undanfarin misseri lagt aukna áherslu á framkvæmd eigendahlutverks sjóðsins. Liður í því er uppfærsla stjórnar á hluthafastefnu sjóðsins í desember sl.

14. feb. 2024

Í hluthafastefnunni er fjallað um atriði sem sjóðurinn leggur áherslu á gagnvart þeim félögum sem hann fjárfestir í og þeim félögum sem hann tekur til skoðunar sem fjárfestingarkost.

Hluthafastefna sjóðsins myndar heild með fjárfestingarstefnu og stefnum LV um ábyrgar fjárfestingar.

Hér eftir sem hingað til er lögð áhersla á verðmætasköpun til langs tíma, góða stjórnarhætti, jafnræði hluthafa og fylgni við lög og önnur gild viðmið.

Meðal nýmæla í hluthafastefnunni:

Ítarlegri útskýringar á þáttum er varða starfskjarastefnu fyrirtækja og upplýsingar um framkvæmd þeirra. Mið er tekið að löggjöf ESB um réttindi og skyldur hluthafa (e.  Shareholder Rights Directive II) sem verður innleidd í íslenskan rétt innan tíðar og samræmist þeim reglum sem félög í ESB starfa þegar eftir.
Hvatning til fyrirtækja um að setja sér reglur um framkvæmd viðskipta tengdra aðila í takt við ákvæði laga um hlutafélög, leiðbeiningar um stjórnarhætti og tilskipun ESB um réttindi og skyldur hluthafa.
Aukin áhersla á stefnu og upplýsingagjöf um sjálfbærni, með vísan til ákvæði laga um ársreikninga, gild viðmið og tilskipun ESB um sjálfbærniupplýsingar sem lögfest verður á Íslandi innan tíðar. Mikilvægt er að fyrirtæki hugi tímanlega að slíkri innleiðingu þar sem hún tekur nokkurn tíma og kallar á greiningarvinnu og stefnumótun. Máli  skiptir að fyrirtæki byggi stefnu sína og framkvæmd á mikilvægisgreiningu. Þannig er best tryggð að vinna við þessa þætti styðji við góðan rekstur, áhættustýringu og greiningu viðskiptatækifæra.
Tekið er fram að æskilegt sé að formaður stjórnar sé kosinn beint af hluthöfum á hluthafafundi.
Áhersla er lögð á að félög móti sér stefnu varðandi arðgreiðslur, fjármagnsskipan og stefnu varðandi aðra ráðstöfun fjármuna til hluthafa eins og kaup á eigin hlutabréfum.
Ítarlegri ákvæði um tilnefningarnefndir, skipan þeirra, hlutverk og form tillagna um skipan stjórnar.
Ýmis atriði sem varða hlutverk stjórna félaga. Til að mynda varðandi ráðningu forstjóra og upplýsingagjöf.

LV mun á næstu vikum og mánuðum kynna efnisatriði stefnunnar almennt og beint gagnvart hlutafélögum eftir því sem tilefni er til.

Viðtal við Arne Vagn Olsen, forstöðumann eignastýringar LV um hluthafastefnuna má finna í Viðskiptablaðinu 14.2.2024 og á áskriftarvef sama miðils.

Hluthafastefna Ábyrgar fjárfestingar

Sláðu inn leitarorð

Nýjar áherslur í hluthafastefnu LV