Já, það má greiða inn á höfuðstól hvenær sem er án kostnaðar.

Til þessa að greiða inn á lán þá þarf að skrá sig með rafrænum skilríkjum inn á Mínar síður, fara undir stöðu láns og velja greiða inn á lán.   

Greiðsla inn á lán þarf að koma frá reikningi í eigu skuldara, nema um sé að ræða uppgreiðslu vegna endurfjármögnunar eða fasteignakaupa.

Já, lán má greiða upp hvenær sem er án nokkurs kostnaðar.

Til þessa að greiða inn á lán þá þarf að skrá sig með rafrænum skilríkjum inn á Mínar síður, fara undir stöðu láns og velja greiða upp lán. 

Greiðsla inn á lán þarf að koma frá reikningi í eigu skuldara, nema um sé að ræða uppgreiðslu vegna endurfjármögnunar eða fasteignakaupa.

Þú átt rétt á láni ef þú hefur greitt iðgjöld eða í séreign í 6 af s.l. 12 mánuðum fyrir umsókn eða í samtals 36 mánuði fyrir umsókn.

Skráðu þig með rafrænum skilríkjum inn á Mínar síður til að staðfesta hvort þú átt lánsrétt. 

Fyrstu kaupendur hafa lánsrétt ef þeir hafa greitt einu sinni iðgjald eða í séreign til sjóðsins á síðustu 12 mánuðum. 

Aðeins er lánað gegn íbúðarhúsnæði á Íslandi í eigu lántaka. 

Áhvílandi uppreiknaðar veðskuldir að viðbættu láni sjóðsins, mega við lánveitingu ekki vera umfram 70% af verðmæti veðs. 

Ef veðsetning vegna lántöku eða veðflutnings lána hjá sjóðnum er umfram 65% er almennt gerður áskilnaður um að veðsetning til þriðja aðila (annars en Lífeyrissjóðs verzlunarmanna) nemi ekki hærra hlutfalli en 20% af metnu virði veðsins. 

Veðsetning skal reiknuð út frá söluverði samkvæmt kaupsamningi þegar um lánveitingar í tengslum við fasteignaviðskipti er að ræða. Annars skal miða við gildandi fasteignamat. 

Hámarks lánsfjárhæð er kr. 95.000.000. Ef heildar lánsfjárhæð fer yfir kr. 75.000.000, þá má lánshæfismat ekki vera lægra en B1 og áætlað ráðstöfunarfé eftir lántöku má ekki vera lægra en kr. 180.000. Heildarupphæð áhvílandi lána, að meðtöldu nýju láni, má ekki fara yfir hámarkslán hjá sjóðnum.

Lágmarksfjárhæð láns er kr. 1.000.000.

Að hámarki er lánað 70% af fasteignamati eða kaupverði eignar ef um er að ræða fasteignakaup. Ekki er miðað við verðmat.

Ef hlutfall lána frá öðrum lánastofnunum er umfram 20% af veðrými, þá er hámarks veðsetning 65% af fasteignamati eða kaupsamningsverði, ef um er að ræða fasteignakaup.

Ef áhvílandi uppreiknaðar veðskuldir að viðbættu láni sjóðsins eru hærri en hámarkslán hjá sjóðnum þá er lagt mat á það út frá hagsmunum sjóðsins, þrátt fyrir reglur um veðsetningarhlutfall.

Hámarks lánstími verðtryggðra lána er 5 til 25 ár en 5 til 40 ár fyrir fyrstu kaupendur.

Hámarks lánstími óverðtryggðra lána er til allt að 40 ára fyrir alla.

Fjöldi gjalddaga á ári eru ávallt 12. 

Þegar lán er með jöfnum afborgunum þá er greitt jafnt af höfuðstól allan tímann. Mánaðarleg greiðslubyrði er því hærri í upphafi, en fer svo lækkandi þar sem að vaxtabyrði minnkar. Eignamyndun er hraðari.

Þegar lán er með jöfnum greiðslum þá er mánaðarleg greiðslubyrði jöfn út lánstímann (ef lánið er verðtryggt þá hækkar hún). Mánaðarlegar greiðslur eru því lægri í upphafi, en eignamyndun er hægari.

Lánareiknivélin reiknar úr greiðslubyrði láns og hvernig greiðslur skiptast á lánstímanum.

Ef annar aðili en maki, sem er giftur eða í staðfestri sambúð með lántaka, á eignarhlut með lántaka er ekki hægt að fá lán út á þá eign.

Já, í þeim tilvikum ef hann á fasteignina sem boðin er fram sem veð í heild eða hluta á móti lántaka. Einnig þarf maki að gerast samskuldari ef hann er greiðslumetinn ásamt lántaka.

Nei, lánsveð eru ekki í boði.

Þetta á við lán sem veitt eru fyrir 1. maí 2026: 

Tilkynning er send viðkomandi aðila að minnsta kosti 30 dögum áður en vaxtabreyting á sér stað sbr. við 35. gr. laga nr. 118/2016 um fasteignalán til neytenda.  Ef þú aðhefst ekkert festast vextir á láninu þínu aftur til þriggja ára og þá á þeim kjörum sem eru í boði á slíkum lánum á þeim tíma, en upplýsingar um vaxtakjör á hverjum tíma má nálgast á vefsíðu sjóðsins. Þú hefur jafnframt val um að færa þig í verðtryggt lán á þessum tíma án lántökugjalds.

Þetta á við lán sem veitt eru fyrir 1. maí 2026.  

Tilkynning er send viðkomandi aðila að minnsta kosti 30 dögum áður en vaxtabreyting á sér stað sbr. við 35. gr. laga nr. 118/2016 um fasteignalán til neytenda. Ef þú aðhefst ekkert festast vextir á láninu þínu aftur til fimm ára og þá á þeim kjörum sem eru í boði á slíkum lánum á þeim tíma, en upplýsingar um vaxtakjör á hverjum tíma má nálgast á vefsíðu sjóðsins.

Nei eingöngu greiðslumat frá Lífeyrissjóði verzlunarmanna er tekið gilt. Áður en samningur um fasteignalán er gerður skal meta lánshæfi og greiðslumat allra umsækjanda.

Um lánshæfismat og greiðslumat er vísað til 6. tl. og 15. tl. 1. mgr. 4. gr., 20. gr., 22. gr., 23. gr. og 24. gr. laga nr. 118/2016 um fasteignalán til neytenda.

Það er ekki hægt að taka mið af erlendum tekjum í greiðslumati.

Ef þú ert einnig með launatekjur í íslenskum krónum, getur greiðslumat grundvallast á þeim tekjum, til samræmis við gjaldmiðil lánsins.

Umsækjandi verður að hafa lögheimili á Íslandi.

Þó skilmálar sjóðfélagalána LV hafi tekið nokkrum orðalagsbreytingum í tímans rás, er þess þó almennt getið í þeim að vextir taki mið af vöxtum ákvörðuðum af Seðlabanka Íslands, ávöxtunarkröfu ríkisskuldabréfa, áhættumati sjóðsins á hverjum tíma, og kostnaði af umsýslu lánanna.

Rétt er að gera ítarlegri grein fyrir forsendum að baki ákvörðun vaxta sjóðfélagalána skv. skilmálum þeirra.

Ákvörðun vaxta sjóðfélagalána byggir á fræðilegum grunni

Vaxtaákvarðanir byggja einkum á svonefndri vaxtabrú, aðferðafræði sem felst í því að reikna vaxtaálag ofan á áhættulausa vexti. Áhættulausir vextir eru metnir út frá vöxtum ákvörðuðum af Seðlabanka Íslands og ávöxtunarkröfu ríkisskuldabréfa en vaxtaálag er miðað við hvern og einn áhættuþátt sjóðfélagalána.

Verðlagning sjóðfélagalána er reiknuð samkvæmt aðferðafræði þar sem tekið er tillit til eftirfarandi þátta:

• Áhættulausir vextir á markaði. Hér er horft til vaxta sem ákvarðaðir eru af Seðlabanka Íslands ásamt ávöxtunarkröfu ríkisskuldabréfa á verðbréfamörkuðum. Saman mynda þessir vextir svokallað áhættulaust vaxtaróf fyrir mismunandi tímalengdir. Með þeim hætti má meta áhættulausa vexti til mismunandi líftíma byggt á vaxtakjörum Seðlabankans og á skuldabréfamarkaði á hverjum tíma. Þeir vextir sem samsvara líftíma hvers lánsforms fyrir sig eru svo nýttir sem áhættulausir vextir fyrir viðkomandi sjóðfélagalán.
  
  Sem dæmi má nefna að sjóðfélagalán með fasta vexti í þrjú ár miðast við áhættulausa vexti með svipaðan líftíma, auk vaxtaálags. Jafnframt miðast lán með breytilega vexti, án fasts vaxtatímabils, við stystu áhættulausa vexti, auk vaxtaálags.

• Vaxtaálag sértryggðra skuldabréfa. Hér er stuðst við álag sértryggðra skuldabréfa á ríkisskuldabréf með sama líftíma og fastvaxtatímabil viðkomandi sjóðfélagalána. Sértryggð skuldabréf viðskiptabankanna eru tryggð með veði í dreifðum íbúðalánasöfnum þeirra og eru því að nokkru leyti með sambærilega eiginleika og sjóðfélagalán. Ávöxtunarkrafa sem fjárfestar gera til slíkra bréfa myndar því grunn fyrir verðlagningu sjóðfélagalána.
  
  Fyrir lán á breytilegum vöxtum er miðað við stysta sértryggða álag sem lesa má út úr markaðinum eða stuðst við besta mat þar sem það á við.

• Skuldaraálag. Við ákvörðun vaxta sjóðfélagalána gerir sjóðurinn áhættumat þar sem er lagt mat á skuldaraálag sem endurspeglar þá auknu áhættu sem sjóðurinn tekur við lán til einstaklings umfram það að eiga sértryggð skuldabréf.

• Seljanleikaálag. Hér er horft til þess hvort skuldabréf sé seljanlegt eins og á við um ríkisskuldabréf, eða hvort líklegt sé að gefa þurfi afslátt af verðinu við sölu eins og í tilviki illseljanlegra skuldabréfa. Sjóðfélagalán flokkast sem illseljanleg skuldabréf og endurspeglast það í vaxtaálagi.

• Umsýsluálag. Hér er horft til þess kostnaðar sem hlýst af umsýslu sjóðfélagalána. Bæði kemur þar til rekstur lánadeildar auk aðkomu sérfræðinga sjóðsins hvort sem er frá eignastýringu, áhættustýringu, lögfræðisviði eða annarra sviða sjóðsins sem koma að rekstri sjóðfélagalána.

• Uppgreiðsluálag. Hér er horft til þess að verðleggja þann valrétt lántaka að geta greitt upp lán án uppgreiðslugjalds. Betra er fyrir lánveitanda að tryggja sér vexti til lengri tíma fremur en að fá sjóðfélagalánið uppgreitt fyrr en skv. skilmálum þess og þurfa þá að endurfjárfesta í staðinn, mögulega á lakari kjörum. Rétturinn til uppgreiðslu er því verðlagður og endurspeglast í uppgreiðsluálagi.

Saman mynda ofantaldir sex þættir mat á vaxtakjörum sem eiga við sjóðfélagalán. Þeir þættir geta breyst eftir eðli verðbréfamarkaða hverju sinni. Hækki Seðlabanki Íslands vexti má almennt búast við því að ávöxtunarkrafa ríkisskuldabréfa hækki og að hækki vaxtakjör sjóðfélagalána. Það sama á við þegar Seðlabanki Íslands lækkar vexti, þá lækka að öllu jöfnu vaxtakjör á verðbréfamörkuðum og endurspeglast það í vaxtakjörum sjóðfélagalána.

Vextir sjóðfélagalána taka þó ekki tafarlaust breytingum í takti við breytingar á markaði, þar sem sjóðurinn þarf nokkurt svigrúm til þess að meta sveifur á markaði og bregðast við þeim með viðeigandi hætti.

Fyrstu kaupendur geta fengið verðtryggt lán til 40 ára. 

Fyrstu kaupendur hafa lánsrétt hjá sjóðnum ef þeir hafa einu sinni greitt iðgjald til sjóðsins eða greitt einu sinni í séreignarsparnað á síðustu 12 mánuðum.

Ekkert uppgreiðslugjald er á húsnæðislánum sjóðsins og er hægt að greiða þau upp, eða greiða inn á þau hvenær sem er.

Samkvæmt reglum frá Seðlabanka Íslands má greiðslubyrðarhlutfall, sem er hlutfall af tekjum og fasteignalánum, ekki vera hærra en 40% hjá þeim sem eru að kaupa í fyrsta skipti.

Seðlabankinn hefur sett reglur um hámark greiðslubyrðar fasteignalána í hlutfalli við tekjur neytenda.

Hámark mánaðarlegrar greiðslubyrðar allra fasteignalána lántaka má ekki fara yfir 35% af mánaðarlegum ráðstöfunartekjum neytenda þegar fasteignalán er veitt. Hámarkið má þó vera 40% ef um er að ræða fyrstu fasteignakaup.

Við útreikning á greiðslubyrðarhlutfallinu er miðað við að lán séu jafngreiðslulán.

• Fyrir óverðtryggð lán er reiknað með 40 ára lánstíma og samningsvöxtum en þó að lágmarki 5,5% vöxtum.
• Ef lánið er verðtryggt þá er reiknað með 25 ára lánstíma með samningsvöxtum en þó að lágmarki 3% vöxtum.