Fjárfestingarumhverfi sjóðsins var fremur hagstætt á árinu 2025 sem endurspeglast í ágætri ávöxtun eignasafnanna. Vaxtalækkunarferli Seðlabanka Íslands hélt áfram á árinu með þremur vaxtalækkunum og stóðu meginvextir bankans í 7,25% í lok árs. Verðbólga hefur engu að síður verið þrálátari en búist var við.

Innlend skuldabréf og hlutabréf skiluðu góðri ávöxtun. Ávöxtun skuldabréfa árið 2025 var svipuð og árið áður. Þrátt fyrir að vísitölur innlendra hlutabréfa gæfu neikvæða ávöxtun á árinu var ávöxtun félaga dreifð og mörg félög með ákjósanlega ávöxtun. Þá skilaði safn LV í innlendum hlutabréfum umtalsvert betri ávöxtun en viðmiðunarvísitalan.

Á erlendum mörkuðum var jafnframt góð ávöxtun á árinu 2025. Vaxtalækkanir héldu áfram samhliða hjöðnun verðbólgu beggja vegna Atlantshafsins.

Töluverðar sveiflur voru þó á árinu bæði í hlutabréfum og skuldabréfum, meðal annars vegna tollastefnu Bandaríkjanna og óvissu í alþjóðastjórnmálum. Engu að síður skiluðu erlend hlutabréf góðri ávöxtun mælt í grunnmynt fjárfestinganna en töluverð veiking bandaríkjadals dró úr ávöxtun í íslenskum krónum talið. Þó var ávöxtun erlendra hlutabréfa í krónum ágæt í sögulegu samhengi. Sömu sögu er að segja um erlend skuldabréf sem skiluðu góðri ávöxtun í grunnmynt en gengishreyfingar drógu úr ávöxtuninni í íslenskum krónum talið.

Á árinu 2025 lauk vegferð sem hófst árið áður og laut að því að færa bróðurpart erlendrar verðbréfaeignar sameignardeildar úr verðbréfasjóðum í beint eignarhald í sérgreindum eignasöfnum. Á sama tíma var gerður samningur við nýjan vörsluaðila, alþjóðlega bankann JP Morgan, um vörslu erlendra verðbréfasafna sjóðsins. Með breytingunni næst kostnaðarhagræði, aukið gagnsæi eignarhalds og möguleiki á að fylgjast betur með einstökum eignum.

Á árinu hófst umfangsmikil greiningarvinna í samstarfi við alþjóðlega ráðgjafarfyrirtækið Mercer í tengslum við fjárfestingarstefnu LV til lengri tíma. Vinnan var að verulegu leyti fólgin í að yfirfara og endurmeta ávöxtunarmarkmið fyrir eignasöfn LV og í framhaldinu eignasamsetningu þeirra. Í greiningarvinnunni var lagður enn traustari grunnur að forsendum fyrir eignasamsetningu safnanna til lengri tíma.

Auknar áherslur hafa verið lagðar á upplýsingamiðlun með það að markmiði að hvetja sjóðfélaga til að þekkja réttindi sín og að hefja undirbúning starfsloka hjá þeim sem nálgast starfslokaaldur. Upplýsingamyndbönd voru gerð fyrir fyrstu kaupendur fasteigna, þá sem nálgast starfslok og sjóðfélagar sem fögnuðu 50 ára afmæli fengu sérstaka hvatningu um að koma í ráðgjöf til sjóðsins.

Áætluð heildargreiðsla ævilangs lífeyris var í fyrsta sinn birt á yfirliti sjóðfélaga. Það er nýjung að sýna mynd af væntanlegri heildargreiðslu ævilangs lífeyris byggða á spá um ævilengd. 

Eins og undanfarin ár héldu lífeyrisgreiðslur áfram að aukast milli ára og námu samtals
45,4 milljörðum en voru 40,3 milljarðar árið áður. Sjóðfélögum sem fá greiddan lífeyri fjölgaði milli ára og voru 28.970 en 27.577 árið áður.

Þetta er jákvæð þróun fyrir sjóðfélaga þar sem hún sýnir að sífellt fleiri sjóðfélagar eru farnir að njóta afraksturs sparnaðarins í formi lífeyris. Þróun sem byggist á áratuga langri og farsælli rekstrarsögu lífeyrissjóðsins. 

Við árslok 2024 hækkaði sjóðurinn hámarkslán í 95 milljónir króna til að mæta hækkun á fasteignamarkaði undanfarinna ára. Þá hóf sjóðurinn að bjóða sérstök lán til þeirra sem voru að kaupa sínu fyrstu eign þar sem lánshlutfall er hærra en hefðbundin sjóðfélagalán með viðbótarláni, allt að 15% til viðbótar við 70% lánshlutfall. Lánsréttarákvæði voru rýmkuð og þurfa sjóðfélagar einungis að hafa greitt einu sinni á síðustu 12 mánuðum til að öðlast lánsrétt.

Lán til fyrstu kaupenda námu 10,8 milljörðum króna á árinu og ljóst að framboð og þjónusta sjóðsins til þeirra sem eru að fara inn á fasteignamarkaðinn í fyrsta sinn var mikilvæg viðbót til sjóðfélaga. Hlé var gert á auknu veðhlutfalli í lok október vegna óvissu í tengslum við dómsmál um vaxtabreytingar en fyrstu kaupendur fengu áfram lánstíma til 40 ára.

Bráðabirgðaákvæði varðandi víxlverkun greiðslna frá almannatryggingum annars vegar og lífeyrissjóðum hins vegar féll úr gildi haustið 2025 en var lögfest á ný, á meðan stjórnvöld og aðrir viðkomandi hagaðilar leita leiða til að móta nýjan reglugrunn sem styður við sjálfbæra þróun þessara mikilvægu réttinda.

Undir lok árs 2025 kvað Hæstiréttur upp dóma þar sem reyndi á túlkun lagaákvæða og skilmála skuldabréfa fasteignalána með breytilegum vöxtum til einstaklinga. Í kjölfar dómanna hefur ríkt nokkur óvissa á markaði fyrir þessi lán. Viðbrögð LV fólust meðal annars í því að breyta framboði verðtryggðra lána þannig að einungis var boðið upp á slík lán með föstum vöxtum út lánstímann. Þá var gert tímabundið hlé á veitingu lána með óverðtryggðum vöxtum. Stefnt er að því að bæta við lánaframboð sjóðsins innan tíðar.

Fyrsta heildstæða sjálfbærnistefna sjóðsins var samþykkt á árinu. Sjálfbærnistefnan er sett í samræmi við gildandi lög, innri reglur og stefnumótun sjóðsins, þar á meðal stefnu um ábyrgar fjárfestingar og samfélagsábyrgð. Markmiðið er að stuðla að sjálfbærni í rekstri til lengri tíma og styðja við verðmætasköpun fyrir sjóðfélaga og samfélagið allt.

Á árinu 2025 hófst vinna við að rýna áherslur sjóðsins varðandi ábyrgar fjárfestingar og aðferðafræði sjálfbærni, hvað varðar umsýslu eignasafna sjóðsins, lífeyris- og lánaafurðir og rekstur hans almennt. Miðað er við að þeirri vinnu verði lokið vel fyrir árslok 2026.