Algengar spurningar

Hér eru svör við nokkrum algengum spurningum um sjóðinn og lífeyriskerfið. Vanti ítarlegri upplýsingar er hægt að hafa samband við skrifstofu sjóðsins, einnig er mikið ítarefni að finna víða hér á vefnum.

Þarf ég að sækja um ævilangan lífeyri í öllum sjóðum sem ég hef greitt í

Nei, hægt er að merkja við á umsókninni að sjóðurinn sendi umsóknina í alla aðra lífeyrissjóði.

Greiði ég skatt af lífeyrisgreiðslum

Lífeyrisgreiðslur frá lífeyrissjóðum eru skattskyldar með sama hætti og almennar launatekjur.

Við hvaða aldur byrjar maður að greiða í lífeyrissjóð?

Aðild skal hefjast frá fyrsta degi næsta mánaðar eftir að sjóðfélagi hefur náð 16 ára aldri.

Hvar sæki ég um útgreiðslu úr lífeyrissjóðnum?

 Sótt er um rafrænt hér á vef sjóðins.

Hvert er viðmiðið (upphæð fjárhæðar) við eingreiðslu?

Eingreiðsla miðast við heildarréttindi á ári sem eru lægri en 12.000 kr. verðbættar með vísitölu 230.  Eingreiðsla miðað við mars 2017 er kr. 22.774 í heildarréttindi á ári

Greiðir hver og einn lífeyrissjóður inná reikning minn eða kemur sameiginleg greiðsla frá einum sjóð?

Hver lífeyrissjóður greiðir fyrir sig, þó greiðir greiðslustofa lífeyrissjóða fyrir nokkra sjóði í einu

Er hægt að skipta  upp iðgjaldinu í samtryggingu og séreign?

Lífeyrissjóður verzlunarmanna er samtryggingarsjóður og er ekki hægt að skipta upp hinu lögboðna iðgjaldi. Á vinnumarkaði hefur verið samið um hækkun mótframlags launagreiðenda í áföngum úr 8% í 11,5%. Mótframlagið hækkaði sumarið 2016 í 8,5%, hækkar sumarið 2017 í 10% og 2018 í 11,5%. Gert er ráð fyrir að setja megi þessa hækkun í séreign, en reglur þar að lútandi hafa ekki verið settar. Á meðan svo er fer allt iðgjaldið í samtryggingarsjóð.

Er skylda að greiða í lífeyrissjóð?

Já,  það er skylda að greiða í lífeyrissjóð frá 16 ára aldri til 70 ára aldurs.

Get ég ráðið því í hvaða sjóð ég greiði?

Kjarasamningar segja til um í hvaða lífeyrissjóð skuli greiða iðgjöld. Sjálfstætt starfandi og sumir launþegar eru ekki bundnir af ákvæðum kjarasamninga um aðild að lífeyrissjóði og geta valið sjóð að því gefnu að samþykktir viðkomandi sjóðs heimili aðildina. Kjarasamningar VR, annarra félaga verslunar- og skrifstofufólks og nokkurra fleiri fagfélaga kveða á um aðild að Lífeyrissjóði verzlunarmanna. Sjóðurinn er einnig opinn fyrir óbundnum sjóðfélögum.

Skerða laun ævilangan lífeyri?

Nei. Laun hafa ekki áhrif á ævilangan lífeyri. Þetta er réttur, sem sjóðfélaginn hefur áunnið sér með iðgjöldum sínum og tryggir honum ævilangan lífeyri, óháð tekjum. Þetta er stjórnarskrárvarinn eignarréttur, hann er einnig varinn gegn aðför að lögum eins og fjárnámi.

Hvað þýðir áfallalífeyrir, hve lengi er hann greiddur?

Áfallalífeyrir er örorku-, maka- og barnalífeyrir. Ef sjóðfélagi missir starfsorku sína vegna slysa og/eða sjúkdóma eftir að hafa verið sjóðfélagi í tiltekinn tíma hefur hann áunnið sér rétt til örorkulífeyris. Við fráfall sjóðfélaga er greiddur makalífeyrir. Réttur getur skapast til barnalífeyris við bæði fráfall og örorku. Örorkulífeyrir er greiddur til 67 ára aldurs, þá tekur ævilangur lífeyrir við.

Get ég sótt um útfararstyrk úr lífeyrissjóðnum?

Það eru stéttarfélögin sem greiða útfararstyrki, lífeyrissjóðurinn greiðir eingöngu lífeyri.