Allt að 70% veðhlutfall 

Að hámarki er lánað 70% af fasteignamati eða kaupverði eignar ef um er að ræða fasteignakaup.

• Ekki er miðað við verðmat.
• Ef hlutfall lána frá öðrum lánastofnunum er umfram 20% af veðrými, er hámarks veðsetning 65% af fasteignamati eða kaupsamningsverði, ef um er að ræða fasteignakaup.
• Ef áhvílandi uppreiknaðar veðskuldir að viðbættu láni sjóðsins eru hærri en hámarkslán hjá sjóðnum þá er lagt sérstakt mat á þá umsókn út frá hagsmunum sjóðsins, þrátt fyrir reglur um veðsetningarhlutfall.

Einnig þarf að uppfylla eftirfarandi skilyrði:

• Aðeins er lánað gegn veði í íbúðarhúsnæði.
• Húsnæðið þarf að vera að fullu í eigu umsækjanda/lántaka.
• Ef annar aðili en maki, sem er giftur eða í staðfestri sambúð með lántaka, á eignarhlut með lántaka er ekki hægt að fá lán út á þá eign.

Upphæð láns og lánstími

• Lágmarksfjárhæð láns er 1.000.000 kr.
• Hámarksfjárhæð er 95.000.000 kr.
• Lánstími er 5 til 25 ár á verðtryggðum lánum og 5 til 40 ár á verðtryggðum lánum fyrir fyrstu kaupendur. 

Ef heildar lánsfjárhæð fer yfir 75.000.000 kr., þá má lánshæfismat ekki vera lægra en B1 og áætlað ráðstöfunarfé eftir lántöku má ekki vera lægra en kr. 180.000. Heildarupphæð áhvílandi lána, að meðtöldu nýju láni, má ekki fara yfir hámarkslán hjá sjóðnum.

Tekjur sem tekið er mið af í greiðslumati

• Að jafnaði er miðað við tekjur sem koma fram á staðgreiðsluyfirliti frá ríkisskattstjóra fyrir síðustu 12 mánuði.
• Þegar sótt er um lán með rafrænni umsókn þá fylgir henni bæði skattframtal og staðgreiðsluyfirlit og því þarf ekki að senda þær upplýsingar sérstaklega inn.
• Ef umsækjandi vill gera grein fyrir öðrum tekjum sem ekki koma fram á á staðgreiðsluskrá þá þarf að skila inn viðeigandi gögnum í umsókn þeim til staðfestingar. Sjóðurinn áskilur sér rétt til þess að leggja mat á þau gögn út frá sínum innrireglum.
• Við greiðslumat er ekki tekið mið af leigutekjum. 

Ekkert uppgreiðslugjald

Ekkert uppgreiðslugjald er á húsnæðislánum og er hægt að greiða þau upp, eða greiða inn á þau hvenær sem er.

Viltu greiða inn á lán?

Til þessa að greiða inn á lán þá þarf að skrá sig með rafrænum skilríkjum inn á Mínar síður, fara undir stöðu láns og velja greiða upp  lán. 

Greiðsla inn á lán þarf að koma frá reikningi í eigu skuldara, nema um sé að ræða uppgreiðslu vegna endurfjármögnunar eða fasteignakaupa.

Rafrænt ferli

Til að kanna greiðslugetu og hefja umsóknarferlið er farið í gegnum rafrænt greiðslumat.  Þú skráir þig með rafrænum skilríkjum og kerfið leiðir þig áfram. Með upplýstu samþykki þínu sækjum við öll gögn sem nauðsynleg eru til að hefja úrvinnslu umsóknarinnar.

Athugaðu að gjald er tekið fyrir hvert greiðslumat. Þess vegna hvetjum við lántakendur til að hafa í huga viðmið sjóðsins um lántöku og viðmið Seðlabanka Íslands um hámarkshlutfall greiðslubyrðar. Samkvæmt reglunum má hlutfall greiðslubyrði fasteignalána af tekjum ekki vera hærra en 35%, eða 40% hjá fyrstu kaupendum.  

Lánsréttur

Til þess að hafa lánsrétt þá þarft þú að uppfylla eitt af neðangreindum skilyrðum. Að hafa greitt iðgjöld eða í séreign:

• í 6 af síðustu 12 mánuðum fyrir umsókn.
• í að lágmarki 36 mánuði fyrir umsókn.
• Fyrstu kaupendur hafa lánsrétt ef þeir hafa greitt einu sinni iðgjald eða í séreign á síðustu 12 mánuðum.

Eða vera maki lífeyrisþega enda hafi maki umsækjanda átt lánsrétt. 

Önnur skilyrði

Þú þarft einnig að hafa skráð lögheimili á Íslandi og lán hjá sjóðnum mega ekki vera í vanskilum.  Ef um er að ræða hjón eða fólk í staðfestri sambúð er nóg að annar aðilinn sé með lánsrétt.