Árið 2022 námu iðgjaldagreiðslur til Lífeyrissjóðs verzlunarmanna um 42,5 milljörðum króna vegna 49 þúsund sjóðfélaga. Lífeyrisgreiðslur hafa vaxið hratt undanfarin ár og námu rúmum 26 milljörðum á árinu samanborið við tæpa 23 milljarða árið áður. Fjöldi sjóðfélaga sem fengu greiddan lífeyri var yfir 22 þúsund.

Fjárfestingarumhverfi var krefjandi á árinu og ber afkoma eignasafna þess merki. Nafnávöxtun sameignardeildar var -3,6% og raunávöxtun var -11,9%. Langtímaávöxtun er hins vegar góð og nemur árleg raunávöxtun sjóðsins undanfarin tíu ár 5,3%. Verðbólga var sú mesta í áraraðir og
stýrivextir hérlendis og erlendis hækkuðu umtalsvert. Í slíku umhverfi eiga fjármálamarkaðir
jafnan erfitt uppdráttar en bæði hluta- og skuldabréf lækkuðu töluvert í verði bæði innanlands og erlendis.

Heildareignir sameignar- og séreignardeilda námu í árslok 1.173 milljörðum. 

Helstu tölur fyrir árið 2022

• Iðgjöld til sjóðsins hækkuðu um 10,6% á milli ára og námu 42,5 milljörðum króna.
• Lífeyrisgreiðslur hækkuðu um 15% á milli ára og námu 26,3 milljörðum króna.
• Fjöldi á lífeyri var 22.115.
• Um 49 þúsund greiddu iðgjöld til sjóðsins. 

Raunávöxtun sameignardeildar

• Raunávöxtun sameignardeildar 2022 er -11,9%
• 5 ára árleg raunávöxtun sameignardeildar er 4,9%
• 10 ára árleg raunávöxtun sameignardeildar er 5,3%
• 20 ára árleg raunávöxtun sameignardeildar er 4,6%
• 30 ára árleg raunávöxtun sameignardeildar er 4,9%

Réttindabreytingar

Um nýliðin áramót tóku gildi umfangsmiklar breytingar á samþykktum LV. Veigamikill þáttur þeirra lítur að því að laga réttindakerfi sameignardeildar að hækkandi lífaldri sjóðfélaga og nýjum viðmiðum við mat á lífaldri. Þá voru gerðar breytingar sem meðal annars auka sveigjanleika við starfslok og lengja lágmarksmakalífeyri.

Tryggingafræðileg staða var -5,6% í árslok 2022 samanborið við 3,5% árið áður. Breytingin kemur til vegna samþykktabreytinga, verðbólgu og neikvæðrar ávöxtunar á árinu.

Yfirlit yfir starfsemina árið 2022