Kennitölur

Hér eru settar fram helstu kennitölur úr ársreikningi 2010.  Kennitölurnar eru sýndar 5 ár aftur í tímann eða allt til ársins 2006.

Ávöxtun

Á árinu 2008 var ávöxtun sjóðsins eins og flestra annarra lífeyrissjóða afar lág vegna alþjóðlegu fjármálakreppunnar og bankahrunsins á Íslandi. Árið 2009 breyttist þessi staða til muna þegar ávöxtun varð aftur jákvæð.

Ávöxtun á árinu 2010 var 6,1% sem samsvarar 3,5% raunávöxtun. Ávöxtun, þegar rekstrarkostnaður hefur verið dreginn frá hreinum fjármunatekjum, var 9,9% sem samsvarar 1,1% raunávöxtun.

Meðalraunávöxtun síðustu fimm ára er -2,0% og síðustu tíu ára 2,4%. Meðalraunávöxtun sjóðsins síðustu tuttugu árin var 4,7%.

Tafla:  Ávöxtun 2006-2010

Kostnaður

Kostnaður sjóðsins er reiknaður annars vegar sem hlutfall af iðgjaldagreiðslum og hins vegar sem hlutfall af heildareignum sjóðsins.

Lífeyrissjóður verzlunarmanna hefur í gegnum tíðina getað státað af lágum rekstrarkostnaði eins og sjá má á myndinni hér að neðan.

Verðbréfaskipting

Samsetning verðbréfaeignar sjóðsins breytist ár frá ári. Hlutfall innlendra verðbréfa hefur aukist í eignasafninu. Erlendar fjárfestingar eru takmarkaðar við gildandi gjaldeyrishöft. Súluritið sýnir þróun verðbréfaeignar á liðnum árum.

Skipting fjárfestinga eftir gjaldmiðlum

Í gegnum tíðina hefur stærsti hluti eigna sjóðsins verið fjárfestur innanlands. Árið 2008 urðu talsverðar breytingar á  þessum hlutföllum þar sem íslenskur hlutabréfamarkaður, og fjármálamarkaðurinn almennt, hrundi. Þetta leiddi til þess að erlendar fjárfestingar jukust hlutfallslega í eignasafni sjóðsins. Sú þróun hélt áfram árið 2009 og 2010 eins og glöggt má sjá á meðfylgjandi súluriti.

Skipting eftir tegund lífeyris

Ellilífeyrir er stærsti flokkurinn en þar á eftir koma örorku-, maka- og barnalífeyrir. Skiptingin hefur haldist nokkuð jöfn á milli ára en ellilífeyririnn hefur þó aukist jafnt og þétt. Að sama skapi hefur hlutfall allra hinna flokkanna lítillega minnkað.

Fjöldi sjóðfélaga og lífeyrisþega

Fjöldi virkra sjóðfélaga hefur vaxið töluvert undanfarin ár. Í árslok 2010 voru lífeyrisþegar alls 10.024 samaborið við 4.894 lífeyrisþegar í árslok 2000 og hefur fjöldinn því rúmlega tvöfaldast á einum áratug.

Lífeyrir í hlutfalli af iðgjöldum nam 41,4% á árinu 2010 samanborið við 37,0% árið áður. Ástæða fyrir hækkandi hlutfalli er að lífeyrisgreislur aukast milli ára en á sama tíma eru litlar breytingar á iðgjaldagreiðslum til sjóðsins.

Tryggingafræðileg staða

Tryggingafræðileg úttekt á stöðu sjóðsins felst í að reikna annars vegar áfallnar skuldbindingar miðað við áunninn rétt sjóðfélaga og hins vegar heildarskuldbindingar miðað við að virkir sjóðfélagar greiði áfram til sjóðsins þar til þeir hefja töku lífeyris.

Við úttektina er miðað við að ávöxtun sjóðsins á næstu áratugum verði 3,5% umfram hækkun vísitölu neysluverðs. Eignir sam­anborið við áfallnar skuldbindingar eru neikvæðar um 2,5%.
Hér má lesa nánar um tryggingafræðilega athugun á sjóðnum.